• Antolaketa politikoa
• Antolaketa zerbitzuka
  • Artxiboa
  • Gizarte Ongizatea
  • Hezkuntza
  • Hirigintza
  • Idazkaritza
  • Kirolak
  • Kontuhartzailetza-
    Hazienda
  • Kultura
  • Liburutegia
  • Museologoa
  • Udaltzaingoa
  • Euskara zerbitzua
• Azpiegiturak
• Proiektuak
• Gai fiskalak
• 2008ko aurrekontu bateratua
• Kontratatzailearen profila
• Deialdiak
• Argitalpenak

• EBPN. Euskara Biziberritzeko Plan Nagusia
• Herritarrentzako zerbitzu eta lagungarriak
• Hizkuntza egoeraren azterketak

Bergarako entitateen arteko HITZARMENA, arlo sozio-kulturalean euskararen erabilera bultzatzekoa

2008-04-12

Euskarak gero eta toki zabalagoa du oraintsu arte arrotz edo debekatuak izan zaizkion arloetan: administrazioan, enpresetan eta komunikabide modernoetan, esaterako.

Euskarak, hainbat urtez egindako ahaleginari esker, nagusitasuna lortu du Bergaran irakaskuntzaren arloan eta, dagoeneko, ume eta gazte gehien-gehienek dakite.

Euskararen Erabilera Arauzkotzeko Oinarrizko Legeak (10/1982, azaroaren 24koak) 26. artikuluan dio Euskal Herriko agintariek gizarte-bizitzako arlo guztietan euskararen erabilera bultzatzeko bitartekoak jarri eta neurri egokiak hartuko dituztela, hala hiritarrek aukera izan dezaten merkataritzan, kulturan, bazkunean, kirolean, erlijioan eta beste edozein jardueratan euskaraz aritzeko.

Hala ere, eskoletan lortutako gaitasunak, legeek aitortzen dizkiguten eskubideek eta agintariek jar ditzaketen bitartekoek balio gutxi izango dute herritarrok ez badugu gure hizkuntza eguneroko jardunean erabiltzen.

Horregatik, hau izenpetzen dugun entitateok, geure hizkuntzaren berreskuratze, modernotze eta zabalkuntzaren prozesuan protagonista izan nahirik, ondorengo helburu eta konpromiso hauek geureganatzen ditugu:

Euskararen erabilera bultzatzeko helburuak eta konpromisoak

A) EZAGUTZA EDO HIZKUNTZA GAITASUNA

1. Ahalegin berezia egingo da entitateko zuzendaritza-organoetako kideak eta, batez ere, lehendakari, idazkari eta diruzaina, beren lana euskaraz betetzeko gaitasuna dutenak izan daitezen

2. Ahalegin berezia egingo da entitateko begirale, entrenatzaile, irakasle zein bestelako langileak euskaldunak izan daitezen, C3 puntuan markatutako helburuak bete ahal izateko.

B) EUSKARAREN BARNE ERABILERA

B.1. ZUZENDARITZA ORGANOETAN

1. Batzar Nagusi, zuzendaritza batzorde, eta abarretako bilerak euskaraz egingo dira, ahal den neurrian.

2. Entitateko zuzendaritza organoetako bilera deiak eta aktak euskaraz idatziko dira, ahal den neurrian, eta premiazkoa denean itzuliko dira gaztelerara.

B.2. BARNE ADMINISTRAZIOAN

1. Entitateak bere barne administrazioa euskaraz eramateko ahalegina egingo du, bai ahoz bai idatziz.

2. Entitatearen estatutu, arautegi, barruko inprimaki eta gisa bereko oinarrizko testuak euskaraz erabiliko dira eta, euskaraz ez badaude, euskaratu egingo dira.

C) EUSKARAREN KANPO ERABILERA

C.1. KANPO IRUDIAN

1. Entitatearen errotulua, kanporako inprimakiak, bazkide txartelak, zigiluak, fakturak, telefono erantzungailua, web gunea eta gisa bereko oinarrizko kanpo erabilerako elementuak euskaraz egongo dira eta ez badaude euskaratu egingo dira.

2. Entitatearen publizitatea euskaraz edota euskaraz eta gaztelaniaz egingo da, baina beti ere, euskarari lehentasuna emango zaio.

C.2. BAZKIDE ETA HERRITARREKIKO HARREMANETAN

1. Bazkide eta herritarrekin harremanak izango dituzten pertsonak euskaldunak izan daitezen ahalegin berezia egingo da.

2. Bazkide eta herritarrei ahoz banaka zuzentzean, ahal den neurrian, lehen hitza beti euskaraz izango da.

3. Bazkide edota herritarrei idatziz banaka zuzentzean, "euskaldunari euskaraz" bidaliko zaio eta besteei, behar izanez gero, euskaraz eta gaztelaniaz.

4. Bazkide edota herritarrei modu orokorrean idatziz zuzentzean, hartzaile denak euskaldunak badira, idatziak euskara hutsean bidaliko dira eta, bestela, euskaraz eta gaztelaniaz baina euskarari lehentasuna emanda.

5. Ahozko komunikazio orokorretan ere, ahal dela, euskarari lehentasuna emango zaio, erdarazkoaren aurretik azalduaz adibidez.

C.3. ENTRENAMENDU, ENTSEGU ETA IKASTAROETAN

1. Ahalegin berezia egingo da entrenamendu, entsegu, ikastaro, eta abarrak euskaraz izan daitezen, bereziki 18 urtez azpiko gazte eta umeei eskaintzen zaizkien ekintzetan.

2. Ahalegin berezia egingo da entrenamendu, entsegu, ikastaro, eta abarretan erabiltzen den material idatzia euskaraz egon dadin, bereziki 18 urtez azpiko gazte eta umeentzako ekintzetan.

C.4. KANPO JARDUERATAN

1. Entitateak herritarrentzako antolatzen dituen jarduerak iragartzeko beti eduki bertsuak izan ohi dituzten esku programa, iragarki, kartel eta abarrak euskara hutsez izango dira. Baldintza hori betetzen ez duten idazkietan euskarari emango zaio lehentasuna.

2. Entitateak antolatzen dituen kanpo jardueretan ere, ahal den neurrian, euskara hutsa erabiliko da megafoniazko mezuetan: aurkezpenetan, sari banaketetan eta abarretan.

D) HITZARMENKIDEEN ARTEKO HARREMANAK eta BESTE ENTITATE BATZUEKIKO HARREMANAK

1. Hitzarmena sinatzen duten entitateen arteko harremanak beti euskaraz izango dira eta hitzarmen hau izenpetzen duten entitateen gaiei buruzko espedienteak ere oso-osorik euskaraz tramitatuko ditu entitate bakoitzak.

2. Entitatea euskaraz komunikatuko da, bai ahoz bai idatziz, posible den heinean, berarekin harremanak dituzten beste erakundeekin ere: Diputazio, Eusko Jaurlaritza, Federazio, etab.

E. HITZARMENAREN DINAMIZAZIOA, JARRAIPENA ETA LAGUNTZABIDEAK.

1. Udaleko Euskara Zerbitzuak teknikari bat jarriko du hitzarmenaren jarraipena eta dinamizazioaz arduratzeko.

2. Era berean, entitate bakoitzak ere pertsona bat izendatuko du, ahal dela zuzendaritzako kidea, Udaleko teknikariarekin batera bere entitateko hitzarmenaren jarraipenaz eta dinamizazioaz arduratzeko.

3. Udalak hitzarmen honen eranskinean agertzen diren laguntza eta zerbitzuak eskainiko dizkie hitzarmeneko partaide diren entitateei.

F. HITZARMENAREN IRAUPENA

Hitzarmen honen iraupena 4 urtekoa izango da.